|
|
ឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានលើកឡើងថា ក្រសួងកសិកម្ម បានកំណត់យកពូជស្រូវចំនួនពីរប្រភេទ ដែលពេញនិយមនិងមានទីផ្សារល្អ ដើម្បីយកទៅផលិតជាពូជទុកលក់ក្នុងតម្លៃសមរម្យជូនដល់ប្រជាកសិករក្នុងការដាំដុះនោះគឺពូជស្រូវសែនក្រអូប និងពូជស្រូវអូអឹម ៥៤-៥១ ។ ការលើកឡើងរបស់ឯកឧត្ដមរដ្ឋមន្រ្ដីនេះ ក្នុងសន្និសីទសារព័ត៌មានស្តីពី «ទស្សនទានក្នុងវិស័យកសិកម្មនៅកម្ពុជា» ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល នាព្រឹកថ្ងៃទី០៥ ខែមករា ឆ្នាំ២០២៣ នៅទីស្ដីការគណៈរដ្ឋមន្រ្ដី។
ឯកឧត្ដម ឌិត ទីណា បានគូសបញ្ជាក់ថា ការងារផលិតពូជស្រូវនេះបានធ្វើឡើងស្របតាមការណែនាំរបស់សម្តេចតេជោនាយករដ្ឋមន្រ្ដី ហ៊ុន សែន ហើយការងារនេះកំពុង មានវឌ្ឍនភាពដែលរំពឹងថានឹងអាចលក់ចែកជូនដល់ប្រជាកសិករយកទៅដាំដុះនៅពេលឆាប់ៗនេះ។ ឯកឧត្ដមរដ្ឋមន្រ្ដីបានថ្លែងថា ការផលិតពូជស្រូវនេះកំពុងតែមានវឌ្ឍនភាពហើយថ្មីៗនេះថវិកា សម្រាប់ការផលិតពូជក៏ទទួលបានការឯកភាពពីសំណាក់ឯកឧត្ដមរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុផងដែរដើម្បីបន្តផលិតពូជស្រូវដែលមានវិញ្ញាបនបត្រ។
ឯកឧត្ដមបានថ្លែងបញ្ជាក់ថា ក្រោយពូជស្រូវនេះផលិតបានក្រសួងកសិកម្ម នឹងរៀបចំជាទស្សនទានមួយជាមួយសហព័ន្ធស្រូវអង្ករ ដែលជាអ្នកទិញស្រូវយកទៅកែច្នៃ ហើយប្រសិនបើកសិករចូលរួមជាមួយទស្សនទានថ្មីនេះ ពួកគាត់នឹងទទួលបានផល ចំណេញតាមរយៈការមានទីផ្សាររួចជាស្រេច មុនពេលដែលគាត់ដាំដុះទៅទៀត។ ទន្ទឹមនេះ ដោយកសិករបានដឹងថានៅពេលបានផលពួកគាត់ត្រូវលក់ឱ្យខាងណា ក្នុងតម្លៃណា និង ក្នុងកម្រិតបរិមាណប៉ុន្មានដែលមិនសល់ជៀសវាងការសល់ស្រូវ។ ឯកឧត្ដមរដ្ឋមន្រ្ដីបានអះអាងថា នៅពេលដែលប្រជាកសិករប្រើប្រាស់នូវពូជស្រូវខ្លួនឯងអាចមាននូវភាពមិនសុទ្ធ និងអាចមានទិន្នផលតិច ខណៈការប្រើប្រាស់ពូជដែលមាន ការបញ្ជាក់ច្បាស់លាស់គឺមានដំណុះខ្ពស់ និងទិន្នផលច្រើនដែលជាការបញ្ចុះថ្លៃដើមនៃការផលិត ។
ឯកឧត្ដមរដ្ឋមន្រ្តីបានឱ្យដឹងទៀតថា ទស្សនទានរបស់ក្រសួងកសិកម្ម គឺត្រូវបែងចែកភោគផលស្មើៗគ្នាទាំងអ្នកទទួលទាន អ្នកផលិត និងអ្នកចែកចាយ ហើយការធានាបានស្ថិរភាពថ្លៃ ផលិតផលគឺដើម្បីកុំឱ្យប៉ះពាល់ទាំងអ្នកផលិតនិងអ្នកទទួលទាន។ ជាមួយគ្នានេះដែរ ឯកឧត្ដមក៏បានលើកឡើងពីទស្សនវិស័យលើខ្សែចង្វាក់ការនាំចេញផលិតផលកសិកម្មកម្ពុជាដោយជំរុញលើការផលិតផលិតផលណាដែលមានគុណភាពខ្ពស់បង្កើនតម្លៃបន្ថែមច្រើនដល់កសិករ។ ឯកឧត្ដមបានបញ្ជាក់បន្ថែមថា៖ «ការផលិតទ្រង់ទ្រាយធំមានតម្លៃថោកមិនមែនសក្ដានុពលរបស់កម្ពុជានោះទេ។ដើម្បីប្រកួតប្រជែងប្រទេសផ្សេងៗ យើងត្រូវជំរុញផលិតផលិតផលជាគន្លឹះ។ ខ្ញុំសូមលើកយកបទពិសោធន៍ជោគជ័យលើម្រេចកំពត ដើម្បីយកទៅអនុវត្តន៍លើផលិតផលកសិកម្មផ្សេងទៀតដែលកម្ពុជាមានសក្ដានុពលធ្វើការនាំចេញ»។
សូមរម្លឹកផងដែរថា កាលពីថ្ងៃទី ២៤ ខែ តុលា ២០២២ ក្នុងឱកាសចែកជូនអង្គរ និងស្រូវពូជជូនដល់ប្រជាពលរដ្ឋរងគ្រោះដោយទឹកជំនន់នៅខេត្តបាត់ដំបង សម្តេចតេជោ ហ៊ុន សែន បានស្នើឱ្យរដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ រកវិធីសាស្ត្រនិងរូបមន្តណាមួយដែលសមស្របសម្រាប់ការផលិតពូជស្រូវក៏ដូចជាពូជដំណាំជាពិសេសផ្តោត លើការផលិតពូជស្រូវ។ សម្តេចតេជោនាយករដ្ឋមន្រ្ដីបានមានប្រសាសន៍ថា៖ «យើងសព្វថ្ងៃនេះពេលដែលបញ្ចេញពូជអស់យើងទៅទិញពូជយកមក មិនប្រាកដថាពូជនោះវាសុទ្ធទេ ។ អីចឹងយើងដកពិសោធន៍ពីមួយឆ្នាំទៅមួយឆ្នាំ …ចាំបាច់ត្រូវរៀបចំឱ្យមានការផលិតពូជស្រូវដោយចាប់ផ្តើមពីគំនិតផ្តួចផ្តើមរបស់រដ្ឋដែលត្រូវការប្រមូលទិញផង ហើយអាចនឹងប្រជាពលរដ្ឋរបស់យើងក៏ ទិញពូជស្រូវ ឬក៏យកស្រូវរបស់យើងទៅដូរជាមួយស្រូវពូជដែលវាសុទ្ធ។ ប្រជាពលរដ្ឋរបស់យើងគាត់ផលិតស្រូវស្រាប់ ហើយយើងគ្រាន់តែជ្រើសរើសតំបន់ណាមួយដែលមានប្រភពទឹកគ្រប់គ្រាន់ហើយយើងដាក់ពូជដែលល្អសម្រាប់ឱ្យគាត់ផលិតពូជហ្នឹងឱ្យយើងតែម្តង »៕